من أول لحظة ظهر فيها الجيش في شوارع مصر والناس قررت تتعامل مع عساكره وظباطه ودباباته علي انها اهلها وجيرانها ، و زي العادة حسن النيه والصبر الصبر الصبر كانوا السمة الرئيسية في التعامل مع كل تجاوزاته وتمريره للقتله اللي اعتدوا علي العزل في التحرير وفرجته عالناس وهي بتموت وانتظاره للكفة الأقوي والأكتر عشان ياخد صفها ويركب نجاحها و بعدين الصبر علي عنفه وسحله وتعذيبه للمتظاهرين و تعليقهم من شعورهم وجلدهم وكهربتهم اللي الكل شافها في شهادات شباب زي الورد دخل كله حماس بثورة كان مستعد يدفع روحه فيها وخرج نفسه مكسورة وكرامته حرقاه، و بعدين الصبر علي انتهاكات الحرية وكشف مهين و مزري علي متظاهرات بغرض كسر عنيهم وإثبات نظرية ان البنات عاهرات والشباب شواذ وصيع ومورهمش حاجة وفاكرين نفسهم بني آدمين
الناس اتعاملت بصبر مبالغ فيه مع فض الاعتصامات بالقوة و محاكمات عسكرية لشباب ملهمش دعوة بالعسكرية ووقفة بالساعات الطويلة قدام النيابات والمحاكم وس ٢٨ و س زفت الطين، و زفة وفرح لما يطلعوا بحكم مع إيقاف التنفيذ مع ان دة حقهم علي فكرة مش جميلة المجلس بيعملها فيهم .. صبر طويل ومش جميل علي وزارة داخلية بتقبض من حر مالنا وهي قاعدة في بيوتها مبتتحركش ومجلس مش بيتحرك سنتي عشان يجبرها علي العمل أو حتي عشان يمنع عنهم المرتبات اللي بيلهفوها مننا
صبر شنيع علي دور عبادة بتولع وجيش بمجلسه بيتفرج في صمت وشماتة " مش هي دي الحرية بتاعتكوا، اشربوا بقي " سمعتها عشر مرات في ٣ اسابيع لما كنت عايزة اولع في اللي قالوهالي وفي نفسي وانا بلعن الصبر في سري . صبر وصبر فوقيه لما كل العواصم العربية طلعت مسيرات بشكل طبيعي في ذكري نكبة العرب كلهم والأمن عندنا قرر يقلع المتظاهرين بنطلوناتهم عشان يثبتولهم ان علم اسرائيل مش حينزل من عالسفارة .. صبر يعلي الضغط لما العمال فضلوا سنين يعتصموا ويتظاهروا ويتشقلبوا عشان حقوقهم – اللي مش هبة ولا جميلة من حد – والمجلس اتعامل معاهم بمنطق الارهاب الاقتصادي و فضل يروج أكاذيب عجلة الإنتاج لغاية ما المواطن المصري البسيط بقي عايز يولع في العامل المصري البسيط برضه
صبر علي صبر واحنا بنصرف من جيبنا الخاص علي علاج مبارك في مستشفي سبع نجوم في شرم الشيخ ومراته حرة طليقة ومحدش بيتحاكم اصلا، اصلا الصبر بدأ من وقت ما سبنا مجلس الهنا شهر ونص لغاية ما طلع قرار القبض عليه وهم بيقولولنا واحنا مالنا متكلموا النائب العام وبراءة الأطفال في عنيهم لغاية ما طلع البعيد يكلمنا من قناة سعودية ويحلف انه حينتقم من اللي شتموه
طب دة صبر أكبر من أي صبر لما اتفرجنا علي سرور حر طليق و عزمي يوم في السجن ويوم برة عشان كبير وعيان ،سوزان عندها سكتة وصفوت صبغة شعره حتخلص وأكيد لازم يطلع يجيب غيرها من سويسرا
يااه علي الاستحمال، بلطجة ونظام قديم وفتنة طائفية وطبقية وإعلام حقير ومحاكمات عسكرية وتعذيب وشتيمة وإهانة وقلة أدب من اللي ميسواش واللي ميسواش ومؤامرات وتحالفات .. والمفروض انها ثورة .. طب علي فكرة بقي هي مش ثورة، هي لسة نص ثورة ومش حتبقي ثورة غير لما ننزل يوم ٢٧ مايو ونفضل قاعدين علي قلب مجلس الشوم والندامة لغاية ما يحلوا عن أهالينا ويسيبونا لحال سبيلنا .. دول حتي مفيهمش محمد نجيب واحد يقولهم جوموا بينا نمشي فيقعدوه في البيت.. يا مجلس عسكري ، الصبر عايز صبر لوحده يا مجلس عسكري، امشوا من نفسكوا من غير تهديد ومن غير قلة قيمة أكتر من كدة عشان انتوا دوركوا جاي .. سواقين التاكسيات مش طايقنكوا علي فكرة وحينزلوا يوم ٢٧ مايو ودة ترمومتر الشارع لو انتو متعرفوش .. خلص الصبر وجايين التحرير نعتذر اننا مشينا بعد ما مبارك مشي ومستنيناش لغاية ما مطالبنا تتحقق .. مبقاش فينا نفس نصبر أكتر من كدة .. كفاية صبرنا علي كل اللي قبليكوا
جايين يوم سبعة وعشرين
No comments:
Post a Comment